Mayın 29-da Azərbaycan estradasının parlaq ulduzu Brilliant Dadaşova Heydər Əliyev Sarayında “Apar məni” adlı konsert proqramı ilə çıxış edib.
“Fire Land Production”ın təşkil etdiyi gecədə Murad Dadaşovla Nərgiz Cəlilova aparıcı kimi səhnəyə çıxıb 12 ildən sonra Brilliant xanımın yenidən sevənlərinin görüşünə gəldiyini söylədilər.
Konsertin açılışı səhnədəki böyük ekranda “Vokaliz” mahnısına çəkilmiş klipin nümayişi və mahnıya uyğun rəqqasların maraqlı ifaları ilə başlandı. Sonra səbəbkar özü pərəstişkarlarının qarşısına çıxıb, intizara son qoydu.
Son bir ayda gərgin qrafikdə çalışdığını diqqətə çatdıran xanım Dadaşova yorğunluğunu dilə gətirsə də, 4 saata yaxın ən sevimli mahnılarını səsləndirməkdən zövq aldı. Musiqiçilərin canlı müşayiəti onu daha ürəklə oxumağa sövq edirdi.
Brilliant xanım onu dinləməyə gələn sənət yoldaşlarına da diqqətsiz yanaşmadı. Elza Seyidcahan, Əlixan Səmədov, Flora Kərimova, Zamiq Hüseynov, Tünzalə Ağayeva, Zülfiyyə Xanbabayeva, Rüstəm Zeynallını səhnəyə dəvət edib, onlarla birlikdə tamaşaçılara möhtəşəm musiqi ziyafəti yaşatdı.
Anşlaqla keçən konserti dinləməyə gələn məşhurlar sırasında müğənnilər Röya Ayxan, Mətanət İsgəndərli, Ruhəngiz Allahverdiyeva, Sevda Yahyayeva, Nüşabə Ələsgərli, Günay İbrahimli, Əfqan Quliyev, Əkbər, Fəqan Səfərov, teleaparıcılar - Nanə Ağamalıyeva, Saleh Bağırov, Elnarə Təhməzova, Emil Şahzadə, Rüfət Ağayev, Samir Bayramlı, Günel Hümbətova, meyxanaçı Namiq Qaraçuxurlu, aktyor Bəhram Bağırzadə, prodüserlər - Tolik, Ataş Hüseynov, Hüseyn Cavadzadə, Təranə Səmədova, eləcə də Ruhi Əliyevanı görmək olardı.
Ən maraqlı məqamlardan biri də B.Dadaşovanın bir neçə dəfə səhnədən enib, tamaşaçılara daha yaxın olması oldu. Arxa sıralara qədər cangüdənsiz gedən superstar ənənəsini davam etdirib “Ay bəri bax” mahnısını onlarla birlikdə oxudu.
Brilliant xanım gecəyarısına qədər davam edən konsertin sonunda söz verdi ki, ən qısa zamanda seçilmiş əsərlərdən ibarət proqram hazırlayıb, musiqini duyan dinləyicilərini yenidən bir araya toplayacaq.
Məlumat üçün bildirək ki, “Apar məni” konsert proqramının informasiya dəstəyi Milli.Az və Day.Az internet portallarına məxsus idi.
Böyütmək üçün şəkillərə klikləyin:
Foto: 1news.az
