Bakıda baş vermiş qəzada iki maşın yanıb, xəsarət alanlardan biri DİN-in şöbə rəisidir [Foto]

Bakının Heydər Əliyev prospektində dəhşətli qəza baş verib. Nizami Rayon Polis İdarəsindən APA-ya verilən məlumata görə, yol nəqliyyat hadisəsi zamanı toqquşan hər iki avtomobil yanıb.


Qəza nəticəsində “90-FP-014” dövlət qeydiyyat nişanlı “Vaz 21-014” və “10- XO-058” dövlət qeydiyyat nişanlı ”Hyundai” markalı avtomobillər toqquşub.



Hadisə yerinə Nizami Rayon Yanğından Mühafizə Xidmətinin əməkdaşları gəlib. Qəza nəticəsində yanan hər iki avtomobil söndürülüb.



Məlumata görə, qəzada 3 nəfər yaralanıb. Onlardan biri polis polkovniki Həsənov Elşən Ağahüseyn oğludur. O, Daxili İşlər Nazirliyinin Baş Təşkilati İnspektor İdarəsinin Nəzarət Əlaqələndirmə şöbəsinin rəisidir.



Digər yaralılar isə Bakı sakinləri, 24 yaşlı Əliyev Taleh Həsənağa oğlu və 1987-ci il təvəllüdlü Xəlilov Fərid Rasim oğludur.



Yaralılar 3 saylı şəhər klinik xəstəxanasının reanimasiya şöbəsinə yerləşdirliblər.



Qəza baş verdiyi anlarda Heydər Əliyev prospektində nəqliyyatın hərəkəti məhdudlaşdırılıb.