Şəmkirdə iki maşın toqquşub, polis əməkdaşı və iki məzun xəsarət alıb

Ötən gün Şəmkir rayonu ərazisində baş verən yol qəzasında polis serjantı və orta məktəbi bitirən iki məzun xəsarət alıb.


Şəmkir Rayon Polis İdarəsindən APA-ya verilən məlumata görə, hadisə rayonun Kür qəsəbəsində qeydə alınıb.



Şəmkir Rayon Polis Şöbəsinin Post Patrul Xidmətinin əməkdaşı, polis serjantı, 1990-cı il təvəllüdlü Vüsal Vidadi oğlu Allahverdiyev idarə etdiyi 57 BS 858 dövlət nömrə nişanlı, "Chevrolet” markalı avtomobil rayonun Muxtariyyət kənd sakini, Elbəy Qasımov adına Muxtariyyət tam orta məktəbin 11-ci sinif şagirdi, İsax Mahir oğlu Aslanlının idarə etdiyi 50 BL 825 dövlət nömrə nişanlı, “VAZ 2106" markalı avtomobillə toqquşub.



Qəza nəticəsində hər iki sürücü və “VAZ 2106”-da olan, həmin məktəbin digər məzunu, 1995-ci il təvəllüdlü Orxan Amil oğlu Nurəddinli müxtəlif bədən xəsarətləri alıb.



Hər üç şəxs müxtəlif bədən xəsarətləri ilə xəstəxanaya yerləşdirilib.



Faktla bağlı araşdırma aparılır.