Bakı-2015: Azərbaycan 14-cü qızıl medalı qazanıb

“Bakı-2015” I Avropa Oyunlarının idman gimnastikası yarışlarında kişilərin paralel qollarda mübarizəsinə yekun vurulub.

APA-nın məlumatına görə, bunadək fərdi çoxnövçülük və gimnastika atında gümüş, komanda yarışları və dayaqla tullanmada bürünc medal qazanan Azərbaycan idmançısı Oleq Stepko növbəti mükafatını əldə edib.

21 yaşlı gimnastımız “Bakı-2015”-də son çıxışını titulla başa vurub. Belə ki, paralel qollarda 15,733 xal yığan Stepko bütün rəqiblərini qabaqlayaraq, çempion adına layiq görülüb. Bu, yığmamızın 14-ü qızıl olmaqla, 33-cü medalıdır. Təmsilçimiz bu hərəkətdə ən yaxın izləyiciləri rusiyalı David Belyavski (15,700) və rumıniyalı Marius Berbeçar (15,600) qabaqlayıb.

Qeyd edək ki, idman gimnastikası yarışları kişilərin turnikdəki çıxışları ilə yekunlaşacaq.