Ərdoğan: Türkiyə üçün ən etibarlı enerji mənbəyi Əlcəzairdir

Türkiyə üçün ən etibarlı enerji mənbəyi Əlcəzairdir. Trend-in "Anadolu" agentliyinə istinadən verdiyi məlumata görə, bunu Türkiyənin Baş naziri Rəcəb Tayyib Ərdoğan Əlcəzairə səfəri zamanı deyib.

Əlcəzairin Türkiyə üçün heç bir zaman uzaq olmadığını vurğulayan Baş nazir bildirib: "Əlcəzair bizdən heç vaxt ayrı olmadı. Siyasi olaraq ayrı qaldığımız illərdə də xalqlarımız həmişə özlərini bir-birilərinə yaxın hiss etdilər".

Ərdoğan sonuncu dəfə 2006-cı ildə gəldiyi Əlcəzairin o vaxtdan etibarən xeyli inkişaf etdiyini qeyd edib: "Əlcəzairin bu potensialı ilə ən qısa zamanda dünyanın inkişaf etmiş ölkələri arasında yer alacağına inanıram".

Baş nazir bildirib ki, Türkiyə sürətlə inkişaf edir, dolayısilə enerji ehtiyacı sürətlə artır: "Bizim üçün ən etibarlı enerji mənbəyi dost və qardaş ölkə Əlcəzairdir. Əlcəzair sıx əməkdaşlıq edəcəyimiz dəyərli bir tərəfdaşdır".

Qeyd edək ki, Rəcəb Tayyib Ərdoğan Əlcəzairdən sonra Tunisə səfər edib.