Bakının Tbilisi prospektinə yeni asfalt örtüyü çəkilir

Bakıda daha bir yolda hərəkət 3 gün müddətinə məhdudlaşdırılıb. Bakı Şəhər Dövlət Yol Polisi İdarəsinin bölmə rəisi Vaqif Əsədovun APA-ya verdiyi məlumata görə, Tbilisi prospektinin İnqilab küçəsi ilə kəsişməsindən İzmir küçəsi ilə kəsişməsinədək yeni asfalt örtüyü çəkilir.


Paytaxtın "20 Yanvar" dairəsindən şəhər istiqamətində yolun sağ hərəkət istiqaməti üzrə nəqliyyat sıxlığının, tıxacların, yol qəza hadisələrinin yaranmaması məqsədilə bildirilir ki, Sumqayıt istiqamətindən şəhərə hərəkət edərkən Beynəlxalq Avtovağzalın inzibati binasının yanından üçüncü kəmər dairəvi yol ilə Badamdar qəsəbəsi, digər istiqamətlər üzrə, yaxud paytaxtın Tbilisi prospektindən Nəqliyyat Nazirliyinin inzibatı binasının yanından kəsişdiyi hissədən Qəbələ meydanı, yaxud Həsənbəy Zərdabi küçəsi kəsişməsindən Yasamal və digər istiqamətlərə, həmçinin Şəfaət Mehdiyev küçəsinin Tbilisi prospekti ilə kəsişməsindən Yasamal və digər istiqamətlərə alternativ yol kimi istifadə oluna bilər.


V. Əsədov onu da bildirib ki, göstərilən istiqamətdə təmir tikinti işləri 3 gün müddətinə bitəcək.