Berti Foqts hesabdan narazı qalıb

“Nəticədən razı qala bilmərəm. Şanslardan yararlana bilmədik, lazımsız səhvlə qələbəni əldən verdik”.


Live.az-ın APA-ya istinadən verdiyi xəbər görə, bunu millimizin baş məşqçisi Berti Foqts deyib.


Azərbaycan yığması dünya çempionatının seçmə qrup mərhələsində bu gün növbəti oyununu keçirdi. Öz meydanında Lüksemburqla qarşılaşan komandamız hesabı açan tərəf olsa da, sonda 1 xalla kifayətləndi. 1:1 hesabı ilə yekunlaşan matçdan sonra təşkil olunan mətbuat konfransında almaniyalı çalışdırıcı bildirib ki, komanda qələbə qazanmalı imiş: “6 oyunun 4-də heç-heçə oynadıq. Amma 3-də qələbə qazanmalı idik. Beynəlxalq futbolda elədir ki, şansından istifadə etməyəndə rəqib qolunu vurur. Biz də sonda daha bir qol buraxa bilərdik. Əvəzində qırmızı vərəqə də aldıq”


- Lüksemburqun qapıçısı meydanda olanlardan ən cüssəlisi idi, ona yerlə qol vurmalı idik. Bunu futbolçulara kim deməli idi?
- Mən 40 ildir futboldayam. Künc zərbələrinin əksəriyyəti yerlə yox, göylə oynanılır.


- 1 xala görə sizi təbrik edirik. Lüksemburqla oyunda niyə 2 dayaq yarımmüdafiəçisi ilə oynayırdınız?
- Təbrikə görə sağ olun. Bu, bizim oyun sistemimizdir. Onu dəyişə bilmərik. Rəqib 2 dayaq yarımmüdafiəçisi ilə oynayırdısa, biz də belə oynamalı idik.


- Vaqif Cavadov sağda, Araz Abdullayev solda oynasaydı, daha yaxşı olmazdımı?
- Araz "Neftçi"də də 5 dəqiqə solda, 85 dəqiqə sağda oynayır. Onun üstünlüyü ondadır ki, cərimə meydanına girəndə sol ayağı ilə oynaya bilir.


- Ardıcıl 2-ci rəsmi oyunda qırmızı vərəqə alırıq. Bu intizamsızlıq nə ilə bağlıdır?
- Bunu hakimdən soruşmaq lazımdır. Vərəqələr fərqlidir. Rauf 2 vərəqəyə görə qırmızı aldı. Subaşiçə isə həmin epizodda birbaşa qırmızı vərəqəni hakimin səhvi sayıram.


- Heç nə ilə yadda qalmayan Branimiri meydana niyə buraxdınız?
- Bizə qol vurmaq üçün 2-ci hücumçu lazım olduğundan, onu buraxdım. O, "Qarabağ"ın heyətində "Neftçi"yə qarşı yaxşı oynamışdı. Rəqibə təzyiq etmək lazım gəldiyindən, 2-ci hücumçunu meydana buraxdıq.


- Bəzi futbolçular borclarını qaytara bildilər? Lüksemburqu, Lixtenşteyni Bakıda uda bilmədiyimiz halda, azarkeşləri borcu kim qaytaracaq?
- Təəssüflər olsun ki, mən özüm oynaya bilmirəm. Biz hücumları cinahlardan qururduq. Məncə, bu gün komandanı tənqid etmək düzgün olmazdı. Komanda çoxlu qol imkanları yaratdı. Sadəcə, məni narazı salan qol imkanlarını istifadə etməməyim oldu.


- Berti Foqts Azərbaycanın qol vurmağı üçün hansı addımları atdı?
- Məşq prosesində sıx müdafiə olunan rəqibə qarşı cinahlardan oynamaqla bağlı hər şeyi etmişdik. Bunun əksəriyyəti bizdə alındı. Sadəcə, qol imkanlarımızdan istifadə edə bilmədik.