Bakı-Qazax yolunda iki maşın toqquşub, ölənlər və yaralananlar var

Daxili İşlər Nazirliyi (DİN) ötən gecə Ağstafa rayonu ərazisində baş verən yol qəzası barədə məlumat açıqlayıb.


APA-nın DİN-in saytına istinadən verdiyi məlumata görə, gecə saat 01.00 radələrində rayonun Yuxarı Göycəli kənd sakini Rafiz Əmiraslanovun idarə etdiyi "VAZ-2107" markalı və Qazax rayon sakini Tural Nəsibovun idarə etdiyi "VAZ-2107" markalı avtomaşınlar toqquşub. Nəticədə R.Əmiraslanov hadisə yerində ölüb, xəsarət almış sərnişinləri, oğlu Fərid və Ağstafa rayon sakini Anar Abbasov, habelə T.Nəsibov və sərnişini, Qazax rayon sakini Qiyas Sarıyev isə xəstəxanaya yerləşdiriliblər.



T.Nəsibov orada dünyasını dəyişib.



Aparılmış araşdırmalar zamanı T.Nəsibovun idarə etdiyi "VAZ-2107" markalı avtomaşının Qazax rayon sakini Səməndər Alıyevə məxsus olması və onun tərəfindən iyunun 8-də Qazax rayonu ərazisindən qaçırılması müəyyən edilib.



Faktla bağlı araşdırma aparılır.