Hacıqabul və Ağsu rayonlarının sərhədində 30 hektardan çox taxıl və örüş sahələri yanıb

Hacıqabul və Ağsu rayonlarının sərhədində, Bakı-Qazax magistral yolundan 7 km aralıda taxıl və örüş sahələrində güclü yanğın baş verib.

APA-nın məlumatına görə, Ağsu rayonunun Padarqışlaq kəndi yaxınlığında baş verən yanğın 3 hektar biçilməmiş taxıl və 30 hektaradək örüş və biçilmiş sahələri əhatə edib.

Hadisə yerinə Hacıqabul rayon dövlət yanğından mühafizə hissəsinin 3 yanğınsöndürən maşını və canlı qüvvəsi cəlb olunub.

Bəzi yerlərdə kənd sakinləri yanğının qarşısını ağır texnika cəlb etməklə öz qüvvələri ilə almağa çalışıb.

Yanğın 23.20 radələrində söndürülüb.