Çempionlar Liqasının 1/4 final mərhələsinin püşkü atılıb

Çempionlar Liqasının 1/4 final mərhələsinin püşkü atılıb. APA-nın məlumatına görə, Avropanın 8 ən güclü komandası bu tədbirdə 4 cütlüyə bölünüb.



Nəhənglərin taleyinə aydınlıq gətirən püşkatma İsveçrənin Nyon şəhərində baş tutub.



Gələn ay baş tutacaq 1/4 finalın cütləri kor püşklə müəyyənləşib. Tədbir zamanı komandalar səbətlərə bölünməyib. Ən mötəbər turnirdə 5 ölkə təmsilçisi mübarizəni davam etdirir. Bunlar İspaniya təmsilçiləri “Real”, “Barselona”, “Atletiko”, Almaniya klubları “Bavariya”, “Volfsburq”, Fransa PSJ-si, İngiltərə “Mançester Siti”si və Portuqaliya “Benfika”sıdı.



İtaliya yığması və “Milan”dakı çıxışı ilə tanınan Canluka Zambrottanın çəkdiyi püşk “Bavariya”nın üzünə gülüb. Almaniya təmsilçisi 8 komanda arasında ən zəifi hesab edilən “Benfika”ya rəqib olub.



Püşkü “Real” üçün də uğurlu hesab etmək olar. Çünki “kral klubu” 1/4 finalda “Volfsburq”la cütlük təşkil edəcək.



“Barselona” İspaniya derbisində “Atletiko” ilə qarşılaşacaq. Digər cütlükdə isə “Mançester Siti” ilə PSJ münasibətlərini aydınlaşdıracaqlar.





1/4 finaldakı cütlüklər:

"Volfsburq" (Almaniya) - "Real" (İspaniya)

"Bavariya" (Almaniya) - "Benfika" (Portuqaliya)

"Barselona" (İspaniya) - "Atletiko" (İspaniya)

PSJ (Fransa) - "Mançester Siti" (İngiltərə)



Qeyd edək ki, 1/4 final mərhələsinin ilk oyunları aprelin 5-6-da, cavab matçları isə 12-13-də keçiriləcək.