"Yəqin ki, “Zirə” avrokuboklara buraxılacaq" - Ramin Musayev

“Zirə” ilk dəfə Premyer Liqaya vəsiqə qazanmasına baxmayaraq, artıq avrokuboklara çıxmağa çox yaxındı. Bu da futbolumuzun inkişafından xəbər verir. Sözsüz ki, həm AFFA, həm də PFL rəhbərliyi belə bir komandanın Avrokubokda iştirak etməsini istəyər”. Bu sözləri APA-ya açıqlamasında Peşəkar Futbol Liqasının (PFL) prezidenti Ramin Musayev deyib.



Bu mövsüm Topaz Premyer Liqasına buraxılan “Zirə” yüksək dəstədə ilk ilindəcə medal qazanmağa yaxındı. Belə ki, arxada qalan 27 turdan sonra 50 xal toplayan paytaxt təmsilçisi turnir cədvəlində 2-ci pillədə qərarlaşıb.



Adil Şükürovun komandası avrokuboklara vəsiqə qazanmağa olduqca yaxın olsa da, bu hüquqdan məhrum ola bilər. UEFA-nın qaydalarına əsasən, hər bir klub azı 3 il fəaliyyət göstərdikdən sonra Avrokuboka buraxıla bilər.



Məsələ ilə bağlı münasibət bildirən Ramin Musayev AFFA-nın “Zirə”yə kömək edəcəyinə və komandanın avrokuboklara buraxılacağına inandığını bildirib: “Təbii ki, UEFA-nın öz qanunları var. Ancaq bildiyimə görə, bu komanda 3 il AFFA-nın üzvüdüsə, Avrokuboka gedə bilər. Mən bilən, “Zirə” 3 ildi AFFA-nın üzvüdü. Dərinliklərini dəqiq deyə bilmərəm, yalançı olaram. Amma AFFA-nın, baş katib Elxan Məmmədovun nəsə edəcəyinə inanıram. Yəqin ki, “Zirə” avrokuboklara buraxılacaq”.



Qeyd edək ki, Bakının digər komandası “İnter” isə futbolçulara borclu olduğu üçün qarşıdakı 3 mövsümün birində avrokuboklardan kənarda qalacaq.