Leonardo DiKaprio "Mövlana" olacaq

XIII əsrin məşhur filosofu Mövlana Cəlaləddin Rumi haqqında film çəkiləcək.

Trend-in Türkiyə mətbuatına istinadən məlumatına görə, məşhur prodüser və ssenari müəllifi Devid Franzoninin çəkəcəyi filmin baş rolunda "Oskar"lı aktyor Leonardo DiKaprionun olacağı gözlənilir.

Mövlananın 22-ci nəsil nəvəsi Esin Çelebi Bayru bu barədə fikirlərini bildirib: "Mövlananın həyatı haqqında film çəkmək istəyən çox adam bizi ziyarət edib. Yeni filmi çəkənlər də bizlə əlaqə qursalar, onlara kömək edə bilərik. Ümid edirəm, gözəl film alınar. Bütün dünya Mövlananı tanıyır. Onun haqqında film çəkərək daha çox şey bilmək istəyirlər. Doğru faktlarla çəksələr, insanlara böyük faydası olar".

O, DiKaprionun Mövlananı canlandıracağı barədə də danışıb: "Kimin çəkiləcəyi önəmli deyil. Doğru-dürüst, o rola uyğun birinin olması bizi də sevindirər".

Qeyd edək ki, Türkiyədə bir çox tənqidçi belə bir filmin əcnəbilər tərəfindən deyil, yerli rejissorlar tərəfindən çəkilməsinin daha doğru olacağını deyirlər.