Azərbaycanın 215 kəndinə verilən içməli suyun tərkibi ilə bağlı nöqsanlar aşkarlanıb

Səhiyyə Nazirliyi Azərbaycanın su mənbələrindəki mövcud vəziyyəti açıqlayıb. APA-nın xəbərinə görə, Səhiyyə Nazirliyinin Respublika Gigiyena və Epidemiologiya Mərkəzinin (RGEM) Sanitar şöbəsinin müdiri Ziyəddin Kazımov bildirib ki, il ərzində mütəmadi olaraq Bakı və digər rayonlarda sutəmizləyici qurğulardan, su mənbələrindən, ayrı-ayrı stasionar nöqtələrdən, modul tipli yeni quraşdırılan qurğulardan içməli su nümunələri götürülərək araşdırılır. Onun sözlərinə görə, sudan götürülmüş nümunələrdə xoşagələn və xoşagəlməz vəziyyətlər müşahidə olunub. Z.Kazımov qeyd edib ki, respublikanın 215 kəndində quraşdırılan modul tipli qurğulardan verilən içməli su nümunələrinin həm fiziki-kimyəvi, həm də bakterioloji göstəricilərində aşkar olunan nöqsanlarla əlaqədar Ekologiya və Təbii Sərvətlər Nazirliyinə məktub göndərilib: “Son 5 ildə mərkəz tərəfindən respublika ərazisində bulaq və yeraltı artezian suların müayinələri ilə əlaqədar araşdırma aparılır, nümunələr götürülür. Bu nümunələrdə də təqdirəlayiq nəticələr əldə olunmayıb. Bununla bağlı yerli icra orqanları qarşısında məsələ qaldırılıb. Ümumiyyətlə, şəhərin və respublikanın ayrı-ayrı ərazilərinin içməli su təchizatı məsələsinə daim nəzarət edilir”.


RGEM-nin Qidalanma gigiyenası şöbəsinin müdiri İmran Abdullayev qeyd edib ki, su istehsalı müəssisələrində suyun yenidən minerallaşdırılması məsələsi bu gün gündəmdədir. Onun sözlərinə görə, bəzi müəssisələrdə su tamamilə sistemdən çıxdıqdan sonra onun yenidən mineralizasiyası aparılır. Bunun müsbət və mənfi tərəflərinin olduğunu deyən İ.Abdullayev qeyd edib ki, minerilazasiya aparılarkən suyun sıfır vəziyyətində minerallaşdırılması prosesi sual altın düşür: “Mineralsız suyun uzun müddət qəbul edilməsi orqanizmdə mikroelementlərin çatışmazlığına səbəb olur. Ona görə su istehsalı müəssisələri bu cür məsələləri diqqətdə saxlamalıdırlar”.


Qida zəhərlənmələri barədə danışan İ.Abdullayev vurğulayıb ki, 2007-2009-cu illə müqayisədə son illərdə qida zəhərlənmələrinin sayı azalıb. Onun sözlərinə görə, qida zəhərlənmələri arasında məişət şəraitində baş verən zəhərlənmələr üstünlük təşkil edir.