Putin və Tramp arasında telefon danışığının təfərrüatları açıqlanıb

Rusiya prezidenti Vladimir Putin və onun amerikalı həmkarı Donald Tramp arasında telefon danışığı məhsuldar və müsbət olub. İki ölkə lideri terrorla mübarizə, Suriya münaqişəsi və Ukraynadakı vəziyyəti müzakirə ediblər. APA-nın xəbərinə görə, bu barədə Kremlin mətbuat xidmətinin yaydığı məlumatda bildirilir.

Prezidentlər həmçinin Yaxın Şərqdəki vəziyyəti, Ərəb-İsrail münaqişəsi, strateji sabitlik sahəsi və nüvə silahın yayılmaması, habelə İranın nüvə proqramı və Koreya yarımadası ətrafındakı məsələlər müzakirə olunub.

Dövlət başçıları mütəmadi olaraq şəxsi əlaqə saxlamağa dair razılığa gəliblər.

V.Putin və D.Tramp iki ölkənin işgüzar dairələri arasında ticari-iqtisadi əlaqələrin bərpa olunmasının vacibliyini qeyd ediblər.

Tərəflər telefon danışığı zamanı konstruktiv, bərabər hüquqlu və qarşılıqlı faydalı şərtlər əsasında əməkdaşlığın bərpası və inkişaf etdirilməsi istiqamətində birgə fəal iş aparmaq niyyətində olduqlarını bildiriblər.



•••




ABŞ prezidenti Donald Tramp və Rusiya dövlət başçısı Vladimir Putin arasında ilk telefon danışığı bu gün, Moskva vaxtı ilə saat 20:00-da baş tutacaq.

APA-nın məlumatına görə, bu barədə Ağ Evin yaydığı açıqlamada bildirilir.

Bundan əvvəl Trampla Putin 2016-cı il, noyabrın 14-də telefonla əlaqə saxlamışdılar. Vladimir Putin Trampı seçkilərdəki qələbəsi münasibətilə təbrik etmişdi.

Məlumata görə, bu gün Donald Tramp həmçinin Almaniya, Fransa, Yaponiya və Avstraliyanın rəhbərləri ilə də telefon danışığı aparacaq.