Ağ Ev: Tramp Lavrova Minsk razılaşmalarını xatırladıb

ABŞ prezidenti Donald Tramp Rusiyanın xarici işlər naziri Sergey Lavrovla görüşdə bildirib ki, rəsmi Moskva Minsk razılaşmalarını yerinə yetirməlidir.

APA-nın xəbərinə görə, bu barədə Ağ Evin məlumatında bildirilir.

“Prezident Tramp Suriyada münaqişəyə son qoymaq üçün birlikdə işləməyin vacibliyini vurğulayıb. Bəşər Əsəd rejimi və İranın təhdidlərinin qarşısının alınmasının vacibliyinə diqqət çəkib”, məlumatda qeyd olunub.

ABŞ prezidenti Lavrovla görüşdə Ukrayna mövzusuna da toxunub. O qeyd edib ki, ABŞ bu ölkədə münaqişənin həllində maraqlıdır və Rusiya Minsk razılaşması çərçivəsində öhdəliyini tam yerinə yetirməlidir.

“Tramp Yaxın Şərqdə və digər regionlarda münaqişələrin həllində Rusiya ilə daha geniş əməkdaşlığın mümkünlüyü barədə danışıb. Prezident həmçinin ABŞ və Rusiya arasında daha yaxşı münasibətlər qurmaq istədiyini vurğulayıb”, Ağ Evin məlumatında bildirilir.

Qeyd edək ki, bu gün Rusiya xarici işlər naziri Sergey Lavrov Vaşinqtonda ABŞ-ın xarici işlər naziri Reks Tillerson və prezident Donald Trampla görüşüb.


10/05/17

ABŞ prezidenti Donald Tramp və Rusiya XİN rəhbəri Sergey Lavrov arasında görüş bu gün baş tutacaq.

Trend-in məlumatına görə, prezident administrasiyasının yaydığı xəbərə görə, görüş Ağ Evdə yerli vaxtla səhər saat 10:30-da mətbuata qapalı keçiriləcək.

Görüşün və danışıqların detalları barədə əlavə məlumat verilməyib.

ABŞ-a səfəri çərçivəsində daha sonra S.Lavrov Alyaskada amerikalı həmkarı Reks Tillersonla da görəşəcək.