Qətlə yetirilən müğənni dəfn olunmaq üçün doğulduğu rayona aparılıb

Qətlə yetirilən müğənni dəfn olunmaq üçün doğulduğu rayona aparılıb.

Bu barədə APA-ya mərhumun dostları məlumat veriblər. Onların sözlərinə görə, mərhum muğam ifaçısı olub.

Mərhumun dostları APA-ya onun fotosunu da göndəriblər.

Nəsimi Rayon Polis İdarəsinin 20-ci Polis Bölməsinin rəisi Nasir Babayev də APA-ya açıqlamasında mərhum S. Mustafayevin müğənni olduğunu təsdiqləyib.

_____


15.50

Bakıda müğənnini qətlə yetirən şəxs həbs edilib.

Nəsimi rayon Polis İdarəsinin 20-ci Polis Bölməsindən APA-ya verilən məlumata görə, həyata keçirilən əməliyyat tədbirlər nəticəsində 26 yaşlı Samir Mustafayevin 16 yaşlı Aydın Azər oğlu Orucov tərəfindən bıçaqlandığı məlum olub. A. Orucov tutularaq istintaqa təhvil verilib.

Baş vermiş hadisə ilə bağlı başlanmış cinayət işi üzrə zəruri istintaq tədbirləri davam etdirilir.

______

14.26

Bakı. Hafiz Heydərov, Fuad Cəfərov – APA. Bakıda öldürülən oğlanın şəxsiyyəti müəyyənləşib.

Nəsimi Rayon Polis İdarəsindən APA-ya verilən məlumata görə, araşdırmalar zamanı ötən gecə BMW servisin qarşısında qətlə yetirilən şəxsin Tərtər sakini, 26 yaşlı Samir Mustafayev olduğu müəyyənləşib. Onun meyiti müayinə edildikdən sonra ailəsinə təhvil verilib.

Polisdən bildirilib ki, S. Mustafayev müğənni olub.

Polisdən artıq qətli törədən şəxsin kimliyinin müəyyənləşdiyi də deyilib. Hazırda həmin şəxsin tutulması istiqamətində tədbirlər davam etdirilir.

İlkin ehtimala görə, hadisə namus üstündə baş verib.

_______

12:42

Bakı. Fuad Cəfərov - APA. Bakıda naməlum kişi qətlə yetirilib. Nəsimi Rayon Polis İdarəsindən APA-ya verilən məlumata görə, hadisə rayon ərazisində yerləşən BMW servisin qarşısında qeydə alınıb.

Döş və kürək nahiyəsindən çoxsaylı bıçaq xəsarətləri alan 30-35 yaşlı naməlum kişi ağır vəziyyətdə xəstəxanaya aparılsa da, onu xilas etmək mümkün olmayıb.

Hazırda ölən kişinin şəxsiyyəti müəyyənləşdirilir. Hadisənin motivi məlum deyil.

Faktla bağlı cinayət işi başlanılıb, araşdırma aparılır.