Şou-biznesdə “Pişik” ləqəbi ilə tanınan müğənni Günel Ələkbərova qalmaqala səbəb olacaq açıqlama verib.
LİVE.az-ın məlumatına görə, “APA TV”-nin “Show time” verilişinə qonaq olan ifaçı bildirib ki, hazırkı dövrdə Türkiyədə azərbaycanlı müğənnilərdən yalnız xalq artisti Zeynəb Xanlarova, Azəri Günel Zeynalovanı tanıyırlar: “
“İstəməzdim ki, məni Türkiyədə tanısınlar. Orda pul qazanmaq olmur. Çünki elə bir şey olsaydı, onlar Azərbaycana axın etməzdilər. Elə nə varsa, bizdə var. Çox təəssüflər olsun ki, o pullar bizim burnumuzun ucundan gəlib keçir, aparırlar. Bəzi insanlar var ki, öz müğənnilərimizə qarşı xəsislik edirlər. Türkiyədən gələn müğənniyə külli miqdarda pul verirlər. Amma azərbaycanlı müğənniyə yox”.
G,Ələkbərova daha sonra bildirib ki, Türkiyədə xalq artisti Zeynəb Xanlarova və müğənni Azəri Günel Zeynalovadan başqa azərbaycanlı müğənni tanınmır: “Türkiyədə bizim müğənnilərdən yalnız Zeynəb Xanlarova və Azəri Günel tanınır. Və bu iki insandan başqa da heç bir müğənnimizi Türkiyədə tanımırlar. Mən Günel Ələkbərova olaraq bunu düşünürəm və təsdiqləyirəm. Sözümün də arxasındayam. Bu mənim öz fikrimdir, gördüyümü deyirəm. Türkiyəyə gedib bir ətək pul töküb klip çəkdirirlər. Elə o pulu özün üçün Azərbaycanda ye də. Azəri Günel Türkiyədə borca-xərcə girib öz cibindən nəsə etməyib. Yəni bəhsə-bəhs klip çəkdirməyib ki, onu orada tanısınlar. O yalnız öz səsi, və sənəti ilə orada sevilib. Hamı onu Türkiyədə tanıyır”.
İfaçı onu da bildirib ki, bu açıqlamasına görə qalmaqala düşməkdən qorxmur: “Bu açıqlamamdan çəkinmirəm. Mən olanı deyirəm. Bizim Türkiyədə başqa tanınan müğənnimiz var ki? Varsa, deyin bilim”.
G.Ələkbərovanın sözlərinə əməkdar artist Səlim Abbasov da qoşulub. O müğənnin dediklərini təsdiqləyib: “Mən Türkiyədə olanda dəfələrlə görmüşəm ki, Zeynəb xanımı izləməyə nə qədər insan gəlib. Digər müğənnilərin də orda tanınmasını istərdim. Amma reallıqdan danışaq, tanımırlar. Çünki Türklər özlərininkin qoyub, bizim müğənnilərə önəm verməzlər. Bu yaxınlarda Üzeyir Mehdizadə də orda konsert verdi, hansısa kütlə ona reaksiya verdi. Ona qalsa mən bir neçə ölkələrdə konsert vermişəm. Mərakeşdə, Cənubi Koreyada konsertlər vermişəm. Ona qalsa məni o ölkələrin çoxu tanıyar. İndi Röya, Aygün, İradə Türkiyədə nəsə etməyə cəhd göstərirlər. Amma dərinə gedəndə onları da tanımırlar”.
Qeyd edək ki, eyni fikri ötən ay “Show time” verilişində qonaq olan müğənni Elariz Məmmədoğlu da söyləmişdi. O bildirmişdi ki, xalq artisti Aygün Kazımova, əməkdar artist Röya Ayxan daxil olmaqla Türkiyədə heç bir müğənnimiz tanımırlar. E.Məmmədoğlunun bu sözlərinə R.Ayxan öz etirazını bildirmişdi.
