Bakıda 20 nəfəri gün vurub, 11 nəfər suda boğularaq ölüb

Bu ilin iyul ayında Bakıda 9 günvurma hadisəsi qeydə alınıb.

Bakı şəhər Təcili və Təxirəsalınmaz Tibbi Yardım Stansiyasının baş həkiminin müavini Oqtay Şahmalıyev APA-ya açıqlamasında deyib ki, gün vuran 9 nəfərdən 4 nəfəri xəstəxanaya yerləşdirilib. Digər 5 nəfər isə ilkin yardım göstərildikdən sonra evə buraxılıb.

Ümumilikdə bu günə kimi 20 nəfəri gün vurub. Onlardan 8 nəfəri xəstəxanaya çatdırılmayıb. Digər 12 nəfər isə ilkin yardım göstərildikdən sonra evə buraxılıb.

O. Şahmalıyev bildirib ki, bu ay ərzində 2 suda boğulma hadisəsi baş verib. Ümumilikdə isə bu günə kimi 15 suda boğulma hadisəsi qeydə alınıb ki, onlarda da 11-i ölümlə nəticələnib, 4 nəfər xəstəxanaya yerləşdirilib. Suda boğulma halları çimərliklərdə, hovuz və kanalda qeydə alınıb.