Səudiyyəli nazir: Azərbaycan OPEC+ sazişinin digər ölkələri üçün nümunədir

Azərbaycan neft hasilatının azaldılması üzrə OPEC+ sazişinin digər iştirakçı ölkələri üçün nümunədir.

Trend-in məlumatına görə, bunu Səudiyyə Ərəbistanının energetika, sənaye və təbii sərvətlər naziri Xalid Əbdüləziz Əl Falih Bakıda keçirilən OPEC və qeyri-OPEC ölkələrinin Nazirlərinin Birgə Monitorinq Komitəsinin 13-cü iclasının yekunlarına dair mətbuat konfransında deyib.

Nazir bildirib ki, söhbət təkcə həcmdən deyil, Azərbaycanın çox fəal iştirakından da gedir:

"Əminəm ki, Azərbaycan xüsusilə OPEC+ xartiyasının təsdiq olunmasından sonra hər zaman razılaşmanın liderlərindən biri olacaq. Biz həmişə yeni iştirakçıları alqışlamaqdan şadıq və ümid edirik ki, Azərbaycan bizə yeni ölkələri cəlb etməkdə kömək edəcək".

Əl Falih vurğulayıb ki, Səudiyyə Ərəbistanı hər zaman Azərbaycanla müxtəlif iqtisadi istiqamətlərdə əməkdaşlığa maraq göstərir.

Qeyd edək ki, bu gün Bakıda OPEC və qeyri-OPEC ölkələrinin Nazirlərinin Birgə Monitorinq Komitəsinin 13-cü iclası keçirilib. Toplantıda 14 neft istehsalçısı olan ölkə və OPEC Katibliyi yüksək səviyyədə təmsil olunub.

İclasda OPEC-in bazarın inkişaf tempinin təhlili əsasında hazırlanmış təqdimatı və Müştərək Texniki Komissiyanın (JTC) fevral ayı üzrə hasilat göstəricilərindən bəhs edən hesabatı müzakirə edilib, həmçinin JTC-nin bazarın balanslaşdırılması üzrə tövsiyələri və neft istehsalının azaldılmasına dair öhdəliklərə əməletmə səviyyəsi nəzərdən keçirilib.