İyulun 18-də tanınmış türk müğənnisi Rafet El Roman növbəti dəfə Bakılı pərəstişkarları qarşısında konsert proqramı ilə çıxış edib.
Havanın işıqlı olması səbəbdən bir saat gec başlayan “Romantik yay axşamı” adlı konserti teleaparıcı Nanə Ağamalıyeva açaraq tamaşaçıların, sözün həqiqi mənasında, müsiqi ziyafəti yaşayacağı anonsu ilə çıxış etdi.
Ardı-ardına “Sorma neden”, “Senden sonra”, “Affetmem” adlı hitlərini səsləndirən müğənni hər gəlişində onu tək qoymayan oxşarlarını görüncə, əhvalı yüksəldi: “Elşad və Məsud, gəlin, uzaqda dayanmayın, yaxşı ki, varsınız. Gəlin səhnəyə, sizinlə bərabər havadakı rüzgarı daha da güclü əsdirək”.
Ağ papaqlı Elşad daha ürəkli tərpəndi və ikinci dəfə səhnəyə çıxıb kumiri ilə duet oxumaq istəyinə nail oldu.
Bakı və Avropa konsertlərində yaşadığı ən maraqlı xatirələrindən danışan El Roman son aylar Ezo Genclə birgə oxuduğu, Türkiyə və Azərbaycanda hitə çevrilmiş “Kalbine sürgün” mahnısı haqqında məxsusi açıqlama etdi. İllər öncə Ezo ilə paytaxtımızda tanış olduğunu vurğulayan sənətçi həmyerlimizin səsinə və səhnə mədəniyyətinə heyran olduğunu tamaşaçılardan gizlətmədi.
Alqışlarla səhnəyə təşrif buyuran Ezo Rafetlə birlikdə “Kalbine sürgün” oxuduqdan sonra Azərbaycan dilində sevənlərini salamladı və “Sarı gəlin” xalq mahnısını musiqiçilərin müşayiəti ilə ifa etdi.
Rafetdən səhnəni təhvil alan Ezo bundan sonra bir neçə mahnısını da canlı olaraq oxudu.
İki saata yaxın davam edən konsertdə tanınmış simalardan - teleaparıcı Günay Firudinqızı, müğənnilər – Zarina Məmmədova, Mehin, Lalə və Nurkan, stilist - Elnur Həsənov kameramıza tuş gəldilər.
Məkana toplaşanların bəzilərini, xüsusilə media mənsublarına bir sual qaranlıq qaldı. Görəsən, ən çox gözlənilən qonaq, xalq artisti Aygün Kazımova nə üçün fəxri qonaq kimi konsertə gəlmədi? Təşkilatçı Nahid Emiloğlu bu barədə ünvanladığımız suala konkret cavab vermədi.
Qeyd edək ki, Rafet El Roman bir neçə ay bundan əvvəl, daha dəqiqi Yeni il gecəsində Qəbələdə Aygün xanımla bərabər konsert proqramı ilə çıxış etmişdi. Və media onun məhz bu gecə konsertə gələcəyi haqda xəbər yaymışdı.
İntizarda qalan Rafet səhnədən bu haqda heç bir söz söyləmədi. Əksinə, romantik mahnılarını repertuarına daxil edib sevənlərinə maksimum müsbət enerji ötürməyə çalışdı.
Live.az, Milli.Az,
Foto: 1news.az
