Layihə rəhbəri: "Məktəblərdə siqaret çəkilməsi 90 faiz azalıb"

Live.az Report-a istinadla xəbər verir ki, bunu "Məktəblinin dostu" layihəsi ilə bağlı keçirilən tədbirdə layihə rəhbəri Rüstəm Ağayev deyib.

O bildirib ki, bu müddət ərzində, ümumilikdə, layihənin həyata keçirildiyi orta məktəblərdə 9089 münaqişənin qarşısı alınıb.

Eyni zamanda həmin məktəblərdə 4464 dəfə tibbi yardım göstərilib: "9 məktəblinin həyatı xilas edilib. Ümumilikdə, orta məktəblərə 263təcili tibbi yardım çağırılıb. 9 yanğının qarşısı alınıb. 157 dəfə oğurluq halları aşkarlanıb. Layihə çərçivəsində məktəblərdə siqaret çəkilməsi kəskin  - 90 faiz azalıb. 1113 nəfər psixoloji mərkəzin xidmətindən yararlanıb".
Layihə rəhbəri orta məktəblərdə şagirdlər arasında psixoloji problemlərin səbəblərini də açıqlayıb: "Psixoloqa müraciətlərin səbəbi özünəqapanma, psixiatrik problemlər, davranış pozuntusu, qorxu və fobiya, uşaq-valideyn münasibətlərinin pozulması, dezataptasiya problemi və sairdir. Bu müraciətlərdən ən çoxu dezadaptasiya və davranış pozuntusuna görədir".

"Bu layihənin icrasına başlayan zaman Gürcüstanın təcrübəsinə istinad etmişik", - deyə "Məktəblinin dostu" layihəsinin rəhbəri Rüstəm Ağayev əlavə edib.

Qeyd edək ki, "Məktəblinin dostu" pilot layihəsi 2016-cı ilin dekabrında Təhsil Nazirliyi və Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə tərəfdaşlığı ilə 30 ümumi təhsil müəssisəsində fəaliyyətə başlayıb.