Azərbaycanda kriminal aləmlə yaxın əlaqələri olan daha bir nəfər həbs edilib

Azərbaycanda kriminal aləmlə yaxın əlaqələri olan daha bir nəfər həbs edilib.


Daxili İşlər Nazirliyinin mətbuat xidmətindən APA-ya verilən məlumata görə, Baş Mütəşəkkil Cinayətkarlıqla Mübarizə İdarəsi və Ağstafa Rayon Polis Şöbəsi əməkdaşlarının birgə keçirdikləri əməliyyat-axtarış tədbirləri nəticəsində iyulun 22-də Qazax rayonu ərazisində rayon sakini, əvvəllər məhkum olunmuş Babək Vəliyevin idarə etdiyi “Land Rover” markalı avtomaşın saxlanılıb. Avtomaşına baxış zamanı 1 ədəd “Makarov” tapançası, 12 ədəd patron, 2 ədəd patron darağı, 2 ədəd qumbara, 2 ədəd qumbara alışdırıcısı, 4 ədəd keramika ilə möhkəmləndirilmiş kapsula və 1 ədəd bıçaq aşkar edilərək götürülüb.


APA-nın Qazax rayon hüquq-mühafizə orqanlarından əldə etdiyi məlumata görə, B. Vəliyev əvvəllər bir sıra ağır cinayətlər törətdiyi üçün ümumilikdə 15 il məhkumluq həyatı yaşayıb. Onun kriminal aləmlə yaxın əlaqələrinin olduğu bildirilir.