Növbədənkənar parlament seçkilərində 1047 nəfərin deputatlığa namizədliyi qeydə alınıb

Azərbaycanda fevralın 9-a təyin edilmiş növbədənkənar parlament seçkilərində iştirak etmək üçün indiyə qədər 2431 namizəd müraciət edib.

LİVE.az-ın məlumatına görə, bunu Mərkəzi Seçki Komissiyasının (MSK) sədri Məzahir Pənahov MSK-nın bu gün keçirilən iclasında deyib.

M.Pənahov bildirib ki, onlardan 1047 nəfərin namizədliyi qeydə alınıb:

"Müraciət edən şəxslərin 2358 nəfərinin namizədliyi təsdiq olunub. Onlardan 2247 nəfəri isə imza vərəqələrini götürüb. 1772 nəfəri imza vərəqələrini dolduraraq geri qaytarıb və onlardan 1047 nəfəri qeydə alınıb".

Qeyd edək ki, Azərbaycanda növbədənkənar parlament seçkiləri fevralın 9-da keçiriləcək.