Boris Conson: “Böyük Britaniya yanvarın 31-də Avropa Birliyindən çıxmağa hazırdır”

Böyük Britaniyanın baş naziri Boris Conson əmindir ki, “Brexit” haqqında qanun layihəsinin ölkə parlamentinin hər iki palatası tərəfindən təsdiqlənməsindən sonra krallıq nəzərdə tutulmuş müddətdə - yanvarın 31-də Avropa Birliyini tərk etməyə hazırdır.

LIVE.az TASS-a istinadən xəbər verir ki, hökumət başçısının müvafiq bəyanatı çərşənbə günü axşam baş nazirin “Dauninq-street” dəftərxanası tərəfindən yayılıb.

"Parlament Avropa Birliyindən çıxış haqqında qanun layihəsini qəbul etdi. Bu o deməkdir ki, Birləşmiş Krallıq 31 yanvarda Avropa Birliyini tərk edəcək və vahid şəkildə irəli gedəcəyik. Bir vaxt elə görünürdü ki, biz heç vaxt “Brexit”in finiş xəttini keçməyəcəyik, amma nəhayət bizdə bu alındı”, - deyə Conson bildirib. Baş nazir “Brexit”in tərəfdarları və rəqibləri arasında çəkişmələrə son qoymağa və diqqəti krallığın vacib problemlərinin həllinə, cinayətkarlığa qarşı mübarizəyə və xəstəxanaların işinin yaxşılaşdırılmasına yönəltməyə çağırıb.

İcmalar palatasının ardınca “Brexit” haqqında billin Britaniya parlamentinin Lordlar palatası tərəfindən təsdiq edilməsindən sonra sənədi kraliça II Yelizaveta imzalamalıdır. Bunun cümə axşamı və ya cümə günü olacağı gözlənilir. Bundan sonra ölkənin Avropa Birliyindən çıxışı sənədi qüvvəyə minəcək.