Türkiyədə Atakule qülləsi Azərbaycan bayrağının rəngləri ilə işıqlandırılıb

Türkiyədə Atakule qülləsi Azərbaycan bayrağının rəngləri ilə işıqlandırılıb

Türkiyənin paytaxtı Ankaranın Atakule qülləsi 28 May Respublika Günü münasibətilə Azərbaycanın dövlət bayrağının rəngləri ilə işıqlandırılıb.

Bu barədə Azərbaycan Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva özünün tvitterdəki hesabında bildirib.

İşıqlandırma prosesində Azərbaycan və Türkiyə bayraqları birgə təsvir olunub. Eyni zamanda qüllənin rəngli tablosunda “Azərbaycanın milli günü mübarək olsun!” təbriki yazılıb.

Qeyd edək ki, Atakule qülləsi Ankaranın rəmzi hesab edilir.

///

Tbilisi teleqülləsi Azərbaycan bayrağının rəngləri ilə işıqlandırılıb


Gürcüstanın paytaxtı Tbilisinin teleqülləsi və şəhər şurasının binası Azərbaycan bayrağının rəngləri ilə işıqandırılıb.

Şəhərin əsas simvollarından biri 28 May - Azərbaycanın Respublika Günü münasibətilə göy, qırmızı və yaşıl rənglərdə işıq saçır.

Azərbaycan bayrağı işıqlarla Azadlıq meydanında yerləşən Tbilisi Şəhər Şurasının (sakrebulo) binası üzərində də əks etdirilib.

Perunun dövlət binaları Azərbaycan bayrağının rəngləri ilə işıqlandırılıb


///




Mayın 28-də Azərbaycan Xalq Cümhuriyyətinin 103-cü ildönümünün qeyd olunması şərəfinə Peru Konqresinin binası və paytaxt Lima şəhərinin əsas tarixi rayonu hesab olunan Miraflores bələdiyyəsinin binası Azərbaycan milli bayrağının rəngləri ilə işıqlandırılıb.

Azərbaycan Respublikasının Meksikadakı Səfirliyindən mediaya verilən məlumata görə, bu münasibətlə Konqresdəki Peru-Azərbaycan parlamentlərarası dostluq qrupunun rəhbəri Gilyermo Aliaqa Paxares və Perudakı nümayəndəliyimizin əməkdaşının iştirakı ilə Konqres binasının qarşısında mərasim keçirilib.

Mərasimdə perulu millət vəkili AXC-nin qurulmasının 103-cü ildönümü münasibətilə ölkəmizi təbrik edib və belə tədbirlərin Peru ilə Azərbaycan arasındakı dostluq əlaqələrinin daha da möhkəmlənməsinə töhfə verdiyini bildirib.

Azərbaycanlı diplomat ölkəmiz üçün olduqca əlamətdar tarix olan Respublika Gününün qeyd edilməsi məqsədilə Peru tərəfinin vacib dövlət binalarını üçrəngli bayrağımızın rəngləri ilə işıqlandırması addımına görə təşəkkür edib, habelə ölkə Konqresi tərəfindən qəbul edilmiş təbrik bəyanatına görə minnətdarlığını bildirib.