Gəncədə reyd keçirildi

Gəncədə avtoxuliqanlıq edən və sürət həddini aşan sürücülərə qarşı reyd keçirilib. Kəpəz TV-nin verdiyi məlumata görə, Gəncə şəhər Dövlət Yol Polisi Şöbəsinin əməkdaşları həftəsonu avtoxuliqanlıq edən və sürət həddini aşan sürücülərə qarşı reyd keçirib.

Yoxlama zamanı əsas hədəf avtomobilin görkəmi ilə bağlı əlavələrin edilməsi, görməni məhdudlaşdıran pərdə və plyonkalardan, səsgücləndirici qurğulardan istifadə halları, həmçinin sükan arxasında olan sərxoş sürücülər olub. Reydlərdə yol polisinin "Saxla!" işarəsinə məhəl qoymayanlar da olub ki, həmin avtomobillər barəsində axtarış elan edilib.

Reyd zamanı sürücülük vəsiqəsi olmadan avtomobil idarə edənlərin nəqliyyat vasitəsi cərimə meydançasına aparılıb, təhlükəsizlik kəmərindən istifadə etməyən sürücülər barəsində isə müvafiq qaydada protokol tərtib edilib.