Noyabrın 25-də saat 12:00-da paytaxtın “JW Mariott Absheron” hotelində Amerika Ticarət Palatasının Azərbaycan nümayəndəliyinin təşkilatçılığı ilə “Atabəylər: Şəmsəddin Eldəniz” çoxseriyalı tarixi bədii televiziya filmi layihəsinin və tizerinin təqdimatı keçirilib.
LİVE.az xəbər verir ki, Təqdimatda Azərbaycan Respublikasının mədəniyyət naziri Anar Kərimov, kino xadimləri, biznes strukturlarının rəhbərləri, iş adamları və media təmsilçiləri iştirak ediblər.
Tədbirdə qeyd edilib ki, Azərbaycanın ilk tarixi çoxseriyalı bədii televiziya filmi statusunu alacaq “Atabəylər: Şəmsəddin Eldəniz” Azərbaycan tarixinə dövlət quruculuğu nailiyyətləri, hərbi zəfərlər və mədəni intibah dövrü kimi düşmüş 12-ci əsrdəki hadisələrə iki böyük tarixi şəxsiyyətin – Atabəy Şəmsəddin Eldəniz və Möminə Xatunun həyat hekayətləri fonunda ekran səciyyəsi verəcək. Birinci mövsümdə filmin 24 seriyasının tamaşaçılara təqdim olunması nəzərdə tutulur. Növbəti mövsümdə “Turan yoluna doğan günəş” adlanacaq daha 24 bölümdə Atabəylər dövlətinin digər tarixi simalarının – Məhəmməd Cahan Pəhləvanın və Qızıl Arslanın hakimiyyəti dövrləri əhatə ediləcək.
Mədəniyyət Nazirliyi, “Azərbaycan Televiziya və Radio Verilişləri” QSC, Azərbaycan Milli Elmlər Akademiyasının Tarix İnstitutu, Azərbaycan İlahiyyat İnstitutu və “İMZA” Sosial İnkişafa Dəstək İctimai Birliyinin tərəfdaşlığı ilə ərsəyə gələcək filmin hazırlıq mərhələsi artıq başa çatıb, filmin tizeri çəkilib.
Hazırlıq mərhələsinə tarix, mədəniyyət, ədəbiyyat və dilçilik üzrə mütəxəssislər məsləhətçi qismində cəlb olunub, orta əsrlərin dil üslubu, ədəbi mühiti, sosial-mədəni həyatı barədə geniş araşdırmalar aparılıb. Çoxseriyalı televiziya filmi həm birbaşa tarixi faktlar əsasında, həm də filmi tamaşaçıya daha da maraqlı çatdırmaq üçün yaradıcı heyətin bədii təxəyyülü üzrə ekranlaşdırılacaq.
Türkiyə Radio Televiziya Qurumu (TRT) və Türkiyənin ATV telekanalı ilə ilkin razılaşma əsasında çoxseriyalı televiziya filmlərinin çəkilişi üçün formalaşdırılan yeni prodakşn - “Şahdağfilm”in peşəkar kino işçilərindən ibarət yaradıcı heyəti treninqlər üçün qardaş ölkədə olub.
Filmin məhz bu dövrdə çəkilməsinin xüsusi əhəmiyyəti layihənin təqdimat mərasimində xüsusi vurğulanıb. Bildirilib ki, “Dəmir yumruq” ideologiyası bizi tariximizin qəhrəmanlıq səhifələrini daha əzmlə vərəqləməyə, vətənpərvərlik hisslərini dərindən oyatmağa, gənc nəslin qürurlanması üçün böyük zəminlər hazırlamağa sövq edir.
Ekran işinin çəkilişi üçün Azərbaycanın əsrarəngiz təbiətindən, qədim tarixi abidələrindən və yeni qurulacaq pavilyonlardan istifadə ediləcək. Pavilyonlarda erkən orta əsrlərə aid şəhərlər əks olunacaq. Gəncə, Naxçıvan, Beyləqan, Kutaisi, Təbriz, Dərbənd, Həmədan, Şamaxı şəhərləri, eləcə də Ələmut qalası, Zəngəzur və Qarabağ obası quraşdırılacaq. Şəhərlərdə saraylar, evlər, bazarlar, meydanlar, məscid və mədrəsələr, qalalar, habelə çadırlardan ibarət olacaq digər obalar da mütəxəssislərin köməyi ilə tam həmin dövrə - 12-ci əsrə aid tarixi mənbələrdəki əkslərinə uyğunlaşdırılacaq.
Mədəniyyət Nazirliyinin təəşəbbüsü olaraq filmin çəkilişi boyu inşa ediləcək pavilyonların sonradan muzey-parklar kimi istifadəyə verilməsi nəzərdə tutulur.
Təqdimat mərasimində vurğulanıb ki, ortaya çox gərgin və məsuliyyətli hazırlıq prosesi keçmiş, böyük resurslar cəlb edilmiş və kifayət qədər peşəkarlıqla hazırlanmış zəngin bir layihə qoyulur.
Qeyd olunub ki, bədii televiziya filminin yayım hüququ “Azərbaycan Televiziya və Radio Verilişləri” QSC-yə məxsusdur.
