ADB Azərbaycana ətraf mühitin mühafizəsi üzrə göstəriciləri yaxşılaşdırmaqda kömək edəcək

Asiya İnkişaf Bankının (ADB) prezidenti Mərkəzi və Qərbi Asiyada, o cümlədən Azərbaycanda infrastrukturun səmərəli inkişafını təşviq etmək məqsədilə inkişaf etməkdə olan üzv ölkələrin ətraf mühitin mühafizəsi üzrə göstəricilərinin yaxşılaşdırılması üçün 1 milyon ABŞ dolları məbləğində texniki yardımın ayrılmasını təsdiqləyib.

LIVE.az ADB-yə istinadən xəbər verir ki, texniki yardım ümumregion strategiyasının və ətraf mühitin mühafizəsi üzrə potensialın gücləndirilməsi planının işlənib hazırlanmasını və bu regionda konkret sektorlar və layihələr üzrə məqsədyönlü təlim və məsləhət xidmətlərinin göstərilməsini nəzərdə tutur.

Qrant vəsaitləri ADB-nin Xüsusi Texniki Yardım Fondundan ayrılır. Layihə 3 il müddətinə nəzərdə tutulub. Bank texniki yardımın məbləğinin artırılmasını istisna etmir.

ADB tərəfindən aparılan layihəqabağı tədqiqatlar ətraf mühitin qorunması tədbirlərinin həyata keçirilməsində davamlı boşluqların olduğunu aşkara çıxarıb.

“Dövlət orqanlarının zəif potensialı, qeyri-adekvat qanunvericilik bazası, koordinasiyanın olmaması, normativ tələblərin zəif tətbiqi, yerli ekspertlərin məhdud olması və ekoloji tematik sahələrdə təcrübəli məsləhətçilərə ehtiyac inkişaf etməkdə olan üzv ölkələrdə təhlükəsizlik tədbirlərinin həyata keçirilməsinə əsas maneələrdir. Bu sahədə keçmiş müsbət səylərə baxmayaraq, milli mühafizə sistemlərində hələ də boşluqlar mövcuddur və bu, hərtərəfli təlimatların və icra qaydalarının olmaması ilə daha da dərinləşir. Hələ də ADB və ya icraçı qurumların layihənin hazırlanması və icrası zamanı cəld şəkildə texniki araşdırmaları həyata keçirə bilməməsi kimi boşluqlar mövcuddur”, - hesabatda bildirilir.

Layihədə icraçı və tətbiq edən qurumlara texniki ekspertiza təmin etmək və mühafizə tədbirləri sahəsində yüksək səviyyədə layihə hazırlığına nail olmaq və təminat tədbirlərinin həyata keçirilməsini gücləndirmək üçün beynəlxalq və milli məsləhətçilərin cəlb edilməsi planlaşdırılır. Beynəlxalq məsləhətçilərin çərçivə sazişləri və fərdi seçim metodu ilə 2023-cü ilin sonunadək cəlb edilməsi planlaşdırılır.

Birinci rübdən başlayaraq 2025-ci ilin sonuna qədər təhlükəsizlik üzrə təlim proqramı və icraçı və tətbiq edən qurumlar üçün iş yerində təlim proqramı həyata keçiriləcək. 2024-cü ilin yanvar-oktyabr aylarında əməyin mühafizəsi və təhlükəsizlik texnikası, mədəni irs, tullantıların idarə edilməsi, biomüxtəlifliyin qorunması, çirklənmənin qarşısının alınması və əmək şəraiti üzrə ölkə qiymətləndirmələri aparılacaq.

2025-ci ilin oktyabrından 2026-cı ilin iyul ayına qədər konkret ölkələr üçün əməyin mühafizəsi və təhlükəsizlik texnikası, mədəni irs, tullantıların idarə edilməsi, biomüxtəlifliyin qorunması, çirklənmənin qarşısının alınması və əmək şəraiti üzrə xüsusi təlimatlar hazırlanmalıdır.

2023, 2024 və 2025-ci illərin üçüncü rübü ərzində layihələrdə ətraf mühitin mühafizəsi tədbirlərinin həyata keçirilməsi və monitorinqi, eləcə də ətraf mühitin monitorinqi hesabatlarının hazırlanması üzrə təlimlər keçiriləcək.