Lavrov Kerrinin Suriyadakı kimyəvi silaha dair rəyini rədd edib

ABŞ dövlət katibi Con Kerri Rusiya XİN rəhbəri Serqey Lavrovla telefon danışığında Suriyadakı kimyəvi silahla bağlı öz fikrini izah edib, lakin Lavrov onun bu rəyini rədd edib.

APA-nın “BBC”yə istinadən verdiyi xəbərə görə, bu barədə Rusiya XİN açıqlamasında deyilir.

“Kerri etibarlı adlandırdığı mənbələrin məlumatlarına əsaslanaraq öz rəyini izah edib. Həmin məlumatlara görə, ehtimal edilən kimyəvi silahdan istifadə hallarına görə təqsir Suriya Ərəb Respublikasının rəhbərliyi üzərinə qoyulur”, deyə XİN açıqlamasında bildirilib. Lavrov isə bu nəticələrlə razılaşmayaraq, “Rusiya tərəfinin müvafiq mövqeyini təqdim edib”.

Qeyd edək ki, bundan öncə yayılan xəbərə görə, Ağ Ev ABŞ kəşfiyyatının Suriyada istifadə edilən kimyəvi silahla bağlı hesabatını bu həftə dərc edəcək.