«Azərpoçt» ilin sonuna kimi plastik kartlarının sayını artıracaq

Azərbaycanın milli poçt operatoru «Azərpoçt» MMC bu ilin sonuna kimi buraxdığı plastik ödəniş kartlarının sayını artırmaq niyyətindədir.

APA-nın məlumatına görə, Rabitə və İnformasiya Texnologiyaları Nazirliyinin poçt sektorunun rəhbəri Novruz Məmmədovun verdiyi məlumata əsasən, bu günədək «Azərpoçt» tərəfindən 12 min kart buraxılıb: «Bu kartların əksəriyyəti rabitə müəssisələrinin işçilərinin əmək haqlarının verilməsi üçün buraxılıb. Sifarişçilər içində 2-3 kənar şirkətlər də var. Bu ilin sonuna kimi daha 1 000-dək kart buraxılması nəzərdə tutulur».

N.Məmmədovun sözlərinə görə, hazırda «Azərpoçt» MMC-nin regionlarda və Bakıda quraşdırdığı bankomatların sayı 14, POS-terminalların sayı isə 120 ədəd təşkil edir: «Bankomatların və POS-terminalların sayını artırmaq istəyirik, lakin bu qurğuların şəbəkəsini genişləndirmək müəyyən vəsait tələb edir».