Xətai rayonunda sürüşmə sahəsində aparılan genişmiqyaslı tədqiqat işləri başa çatıb

Ekologiya və Təbii Sərvətlər Nazirliyinin (ETSN) Kompleks Hidrogeologiya və Mühəndis Geologiyası Ekspedisiyası tərəfindən Xətai rayonunun Nəsrəddin Tusi küçəsi ilə Gəncə prospekti arasındakı yamacda yerləşən sürüşmə sahəsində genişmiqyaslı tədqiqat işləri başa çatıb.

Bunu APA-ya açıqlamasında ETSN-in Kompleks Hidrogeologiya və Mühəndis Geologiyası Ekspedisiyasının rəisi Bəxtiyar Qaralov deyib. O bildirib ki, sürüşmə sahəsində yerləşən yaşayış massivində dövlət sifarişinə əsasən həyata keçirilən kompleks-geoloji tədqiqatlar avqustun sonlarında yekunlaşıb.

B. Qaralovun sözlərinə görə, ərazinin dayanıqlığını təmin etmək məqsədilə aparılan tədqiqatlar 1 ay müddətində aparılıb: “Tədqiqatlar zamanı süxurlardan nümunələr götürülüb, onlar laboratoriyalara verilib və hazırda hesablamalar, laborator analizlər aparılır. Hesablamalar ilin sonuna kimi davam edəcək və sonda hesabat hazırlanaraq hökumətə-Nazirlər Kabinetinə təqdim olunacaq”.

Sürüşmə sahələrində hazırkı vəziyyətə gəlincə, B.Qaralov qeyd edib ki, ölkənin sürüşmə zonalarında vəziyyət stabildir.