“Fitch Ratings” beynəlxalq reytinq agentliyi Azərbaycan Dövlət Neft Şirkətinin (SOCAR) 2025-ci ildə ümumi gəlirinin 45,935 milyard ABŞ dolları təşkil edəcəyini proqnozlaşdırır.
SOCAR-ın vergi, faiz, amortizasiyadan öncəki əməliyyat mənfəətinin (EBITDA) 3,317 milyard ABŞ dolları səviyyəsində olacağı gözlənilir.
“Neft və qazın əlverişli qiymətləri SOCAR-ın maliyyə göstəricilərini gücləndirib”, - “Fitch” qeyd edir.
Agentliyin qiymətləndirməsinə görə, şirkətin 2024-cü il üçün gəliri 50,61 milyard ABŞ dolları, əməliyyat EBITDA-sı isə 3,535 milyard ABŞ dolları təşkil edəcək.
Həmçinin EBITDA üzrə rentabelliyin (çıxılmalardan əvvəlki mənfəətin gəlirə nisbəti) 2024-cü ildəki 7 %-dən 2025-ci ildə 7,2 %-ə yüksələcəyi gözlənilir.
Qeyd olunur ki, SOCAR Mərkəzi Asiyadan olan rəqibləri (“KazMunayQaz” və “Özbəkneftqaz” – red.) ilə müqayisədə daha yüksək rentabellik nümayiş etdirir və bu, ticarət əməliyyatlarının əhəmiyyətli həcmi ilə bağlıdır.
SOCAR-ın əsas hasilat yataqları "Azəri-Çıraq-Günəşli", "Şahdəniz", "Ümid-Babək" və "Abşeron"dur. SOCAR gündəlik 120 000 barel gücündə olan Heydər Əliyev adına Bakı Neft Emalı Zavodunu və Türkiyədə gündəlik təxminən 230 000 barel gücündə olan STAR neft emalı zavodunu idarə edir.
Qeyd edək ki, 2023-cü ilin oktyabr ayında "Fitch" SOCAR-ın maliyyə profilinin yaxşılaşması ilə bağlı müstəqil kredit profilini (SCP) 'b+'-dan 'bb-' səviyyəsinə yüksəldib.
Report, Fitch
