“Avropa Qapıları” adı ilə qapı və mebel istehsal edən şirkət cərimə edilib

"Avropa Qapıları" adı ilə qapı və mebel istehsal edən "Tağıyev" şirkəti istehlakçıların hüquqlarını pozur.

İqtisadi İnkişaf Nazirlyinin mətbuat xidmətindən Trend-ə verilən məlumata görə, "Avropa Qapıları" adı ilə qapı və mebel istehsal edən "Tağıyev" şirkəti tərəfindən istehlakçı hüquqlarının pozulması barədə vətəndaşlar Yarməmməd Əhmədov və Məhəmmədəli Əfəndiyev tərəfindən İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə materiallar təqdim edilib. Həmin sənədlər əsasında aparılmış araşdırmalar nəticəsində istehlakçıların hüquqlarının pozulmasının aradan qaldırılması barədə Dövlət Xidməti tərəfindən "Tağıyev" şirkətinə icrası məcburi göstəriş verilib.

Göstərişin yerinə yetirilməsi barədə şirkət tərəfindən Dövlət Xidmətinə məlumat verilmədiyi üçün göstərişin icra vəziyyətinin müəyyən edilməsi məqsədilə "Tağıyev" şirkətində yoxlama aparılıb.

Yoxlama nəticəsində "Tağıyev" şirkəti tərəfindən vətəndaşlar Yarməmməd Əhmədov və Məhəmmədəli Əfəndiyevlə bağlanmış müqavilələrdə nəzərdə tutulan müddətlərə əməl olunmadığı, ödəniş şərtləri pozularaq hazırlanmış məhsulların dəyərinin istehlakçılardan onların faktiki ünvanında deyil, yaşadıqları binanın həyətində tələb olunduğu müəyyən edilib. Aşkar edilmiş pozuntularla əlaqədar müəssisəyə mövcud qanunvericiliyə uyğun olaraq, 4000 manat məbləğində cərimə tətbiq edilib.

Hazırda istehlakçıların hüquqlarının bərpa olunması barədə Dövlət Xidməti tərəfindən "Tağıyev" şirkətinə verilmiş icrası məcburi göstərişin yerinə yetirilməsinin təmin olunması məqsədilə qanunvericilikdə nəzərdə tutulmuş əlavə tədbirlər görülür.

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçılara oxşar hallarla üzləşməmək üçün malları, işləri, xidmətləri alarkən icraçıdan müvafiq müqavilə tələb etməyi, müqavilədə sifarişin bütün xüsusiyyətlərinin düzgün əks olunduğuna və icraçının öhdəliklərinin və məsuliyyətinin göstərildiyinə xüsusi diqqət yetirməyi tövsiyə edir.