Prezident İlham Əliyev Gədəbəydə yeni qızıl emalı zavodunun açılışında iştirak edib

Azərbaycan prezidenti İlham Əliyev sentyabrın 10-da Gədəbəydə “Azerbaijan International Mining Company Limited” şirkətinin yeni zavodunun açılışında iştirak edib.

APA-nın verdiyi xəbərə görə, dövlət başçısına bildirildi ki, yeni zavodun tikintisinə ötən il başlanılıb, bu ilin iyununda başa çatdırılıb. Zavodda saatda 100-150 ton filiz emal olunur. Köhnə zavodda filizin tərkibindən 70 faiz qızıl alınırdısa, yeni müəssisədə bu göstərici 85 faiz təşkil edir. Bu zavodda sulfidli filiz emal olunacaq ki, köhnə müəssisədə bu proses həyata keçirilmirdi. Yeni müəssisənin fəaliyyəti nəticəsində ətraf mühitə kimyəvi maddələrin yayılmasının təsiri azalacaq. Bu məqsədlə anbar tikilib və tullantıların oraya axıdılması üçün xüsusi mühafizə olunan boru xətti çəkilib.

İstehsal prosesini izləyən dövlət başçısına bildirildi ki, zavodda istifadə olunan texnologiyalar xaricdən gətirilib. Emal prosesində istifadə olunan aşındırma sistemi Avstraliyada, çökdürmə sistemi isə Cənubi Afrika Respublikasında istehsal olunub. Köhnə zavodda çökdürmə prosesi açıq havada aparılırdısa, yeni müəssisədə bu əməliyyat qapalı çənlərdə həyata keçirilir. Tikinti sahəsi 14,4 min kvadratmetr olan yeni müəssisədə 32 min unsiya qızıl istehsalı nəzərdə tutulub.

Dövlət başçısına həmçinin bildirildi ki, Gədəbəy yatağı hələ qədim dövrlərdən məlum olmuş, dəfələrlə mis və nəcib metalların çıxarılması məqsədilə istismar edilib. 1864-1917-ci illərdə yataqda müvafiq qaydada dağ-mədən işləri aparılıb. Həmin dövrdə Almaniyanın “Siemens” şirkəti yataqda mis hasilatı ilə məşğul olub, təxminən 2 milyon ton filiz çıxarılıb. 1997-ci ildə Azərbaycanın “Azərqızıl” Dövlət Şirkəti ilə ABŞ-ın “R.V. İnvestment Group Services LLC” şirkəti arasında Gədəbəy, Qoşa, Ordubad qrupu, Söyüdlü, Qızılbulaq və Vecnəli perspektiv qızıl filizi yataqlarının kəşfiyyatı, işlənməsi və hasilatın pay bölgüsü haqqında saziş imzalanıb.

Gədəbəy qızıl-mis layihəsi gəlirdə payı 51 faiz olmaqla Azərbaycan hökuməti ilə birlikdə həyata keçirilir. Payı 49 faiz olan Azərbaycan Beynəlxalq Mədən Əməliyyat Şirkəti layihəyə rəhbərlik edir. Layihə çərçivəsində ilk zavod 2009-cu ildə prezident İlham Əliyevin iştirakı ilə fəaliyyətə başlayıb.

Prezident İlham Əliyev zavodu işə salıb və müəssisədə yaradılmış şəraiti yüksək qiymətləndirib, tapşırıq və tövsiyələrini verib.