Azərbaycanda sümük iliyi transplantasiyasının həyata keçiriləcəyi mərkəzin adı açıqlanıb

“Azərbaycanda ilk dəfə olaraq həyata keçiriləcək sümük iliyinin transplantasiyası əməliyyatına hazırlıq görülür. Hazırlıq işləri yekunlaşandan sonra sümük iliyinin transplantasiyası Talassemiya Mərkəzində həyata keçiriləcək”.

Bu barədə APA-ya açıqlamasında Səhiyyə Nazirliyinin Tibbi yardımın təşkili şöbəsinin baş məsləhətçisi Dadaş Hümbətov məlumat verib. O bildirib ki, hazırda əməliyyatın həyata keçirilməsi üçün lazımi avadanlıqların alınması, işlərin təşkili, mütəxəssislərin hazırlığı istiqamətində işlər gedir: “10 nəfər mütəxəssis bu sahədə lazımı biliklərə yiyələnmək üçün Türkiyədə təhsil almağa göndərilib. Bu kurslar həkimlərin mövcud sahədə mütəxəssis kimi yetişməsinə şərait yaradacaq”.