2013-cü ilin tibb üzrə Nobel mükafatına amerikalı alimlər layiq görülüblər

2013-cü ilin tibb üzrə Nobel mükafatına ABŞ-dan olan alimlər Ceyms Rotman, Rendi Şekman və Tomas Zyudof layiq görülüblər.

APA-nın məlumatına görə, onlar hüceyrələrarası və hüceyrə daxilində protein və digər vasitələrin nizamlanması sahəsindəki kəşfə görə bu mükafatı qazanıblar. Nobel mükafatının təntənəli təqdimat mərasimi dekabrın 10-da Stokholmda keçiriləcək.

Xatırladaq ki, fizika və kimya üzrə qaliblərin adları 8-9 oktyabr, sülh və iqtisadiyyat üzrə isə 11-14 oktyabr tarixlərində açıqlanacaq. Ədəbiyyat üzrə “Nobel” mükafatı qalibinin adını Nobel komitəsi hələlik açıqlamayıb.