“Azərbaycan Dəmir Yolları” Bakıda yük qatarının avtobusla toqquşması haqqında açıqlama yayıb

“Azərbaycan Dəmir Yolları” QSC Bakıda yük qatarı ilə marşrut avtobusunun toqquşması barədə açıqlama yayıb.

QSC-nin Mətbuat Katibliyinin rəisi Nadir Əzməmmədovun APA-ya verdiyi məlumata görə, bu gün saat 06.10-da “Azərbaycan Dəmir Yolları” QSC-nin Əhmədli-Bakı yük mənzilində (Nobel prospektində) yerləşən qorunmayan dəmir yolu keçidində yük qatarı keçidi keçməyə cəhd göstərən “Daewoo” markalı 10 TG 381 dövlət nömrə nişanlı 30 saylı marşrut avtobusu ilə toqquşub.

Hadisə nəticəsində teplovozun qabaq hissəsi zədələnib, avtobusdakı sərnişinlərdən 5-i xəsarət aldığına görə xəstəxanaya aparılıb. Qatarların hərəkətində fasilələrə yol verilməyib, teplovozla hərəkət tərkibi geriyə çəkiləndən sonra keçiddə hərəkət bərpa olunub. Hadisə yerinə Nəqliyyat Nazirliyinin, “Azərbaycan Dəmir Yolları” QSC-nin və Dövlət Yol Polisi əməkdaşlarının iştirakı ilə baxış keçirilib. Müəyyən olunub ki, keçidin texniki vəziyyəti “Dəmir yolu keçidlərinin istismarına dair Təlimat”ın tələblərinə uyğundur. Hadisənin baş verməsinə səbəb sürücünün “Yol hərəkəti haqqında” qanununun 44-cü maddəsinin tələblərinə riayət etməməsi olub.