Zaqatalada yol qəzası baş verib, yaralanan var

Zaqatalada yol qəzası baş verib. APA-nın məlumatına görə, bir nəfərin xəsarət alması ilə nəticələnən yol qəzası Yevlax-Zaqatala-Gürcüstan magistral yolunun 114-cü kilometrliyində, Zaqatala rayonu ərazisindən keçən hissəsində baş verib.

1962-ci il təvəllüdlü Zaqatala şəhər sakini Məmmədov Bəxtiyar Məhəmməd oğlu idarə etdiyi “Hyundai Sonata” markalı 90 LT 662 nişan dövlət nömrəli avtomobillə Qax rayonu istiqamətində hərəkətdə olarkən, eyni istiqamətdə hərəkət edən Qnyaz Əhmədovun idarə etdiyi 90 JH 899 nişan dövlət nömrəli iritutumlu yük maşınını ötmək istəyərkən, ötmə əməlinə düzgün əməl etməyib. Nəticədə Bəxtiyar Məmmədov idarəe tdiyi avtomobili qarşıda gedən yük maşınına vurub.

Baş vermiş qəzadan sonra Bəxtiyar Məmmədovun idarə etdiyi avtomobil yolun sol tərəfinə çıxaraq ağaca dəyib. Qəza nəticəsində yük maşınının sürücüsü xəsarət almasa da, “Hyundai Sonata”nın sürücüsü Bəxtiyar Məmmədov aldığı xəsarətlərlə Zaqatala Mərkəzi Rayon Xəstəxanasına (MRX) aparılıb.

Zaqatala MRX-dan APA-ya verilən məlumata görə, Bəxtiyar Məmmədovun xəsarətləri yüngül olduğundan ona xəstəxanada ilkin yardım göstərildikdən sonra ambulator müalicə almaq üçün evə buraxılıb. Faktla bağlı Daxili İşlər Nazirliyinin (DİN) Baş Dövlət Yol Polisi İdarəsinin istintaq və təhqiqat bölməsində araşdırma aparılır.