Aysel Əlizadənin yeni klipi

Gənc müğənni Aysel Əlizadə mətbuat nümayəndələrinə uzun müddət bundan öncə vəd etdiyi “Səndən başqa” adlı klipini təqdim edib.


Klipin təqdimatı zamanı müğənni bundan öncəki “Ulduzlar” klipini də Teoman Topçuya həvalə etdiyini, onun işindən hər zaman məmnun qaldığını bildirib: “Klipdə mövzu ayrılıq olsa da, heç kimə ayrılıq arzu etmirəm. Təəssüflər olsun ki, hər bir insanın həyatında belə məqamlar olur. Təsadüfdən, bundan öncəki klipim olan “Ulduzlar”da və bu klipin mahnısında da ayrılığı yansıtan cümlələr əks olunub. Təqdim etdiyim klipin çəkilişləri meşədə gerçəkləşib. Çəkiliş prosesi zamanı maraqlı anlar yaşadıq. Bu klipimi də sevimli rejissor Teoman Topçuya həvalə etdim. Çünki onun işini çox bəyənirəm. Onunla işləmək mənim üçün çox rahatdır. Biz birlikdə işləyəndə heç nədən narahat olmuram. Klip çəkilən zaman da mən Teaomana heç bir sual vermirəm. Bilirəm ki, nəticədə o mənim düşündüyümdən də gözəl iş ortaya çıxaracaq”.

Mətbuat nümayəndələrinin klipin maliyyəsi barədə sualına müğənni tam aydınlıq gətirməsə də, həmin klipin əvəzinə 2-3 klip ərsəyə gətirə biləcəyini söyləyib:

“Klipin maliyyəsi barədə heç bir söz demək istəmirəm. Çünki bundan öncəki klip təqdimatında mətbuat nümayəndələrinin maliyyə ilə bağlı sualına cavab verdikdən sonra mətbuatda klipi deyil, daha çox onun məbləğini işıqlandırdılar. Bu da böyük qalmaqala səbəb oldu. Efir vasitəsi ilə kimisi çıxıb dedi ki, həmin pula ev alaram, kimisi isə maşın ala biləcəyini bildirdi. Yəni deməyim odur ki, bu məsələ ötən klip təqdimatından sonra tamaşaçıların qınağına tuş gəldim. Əziyyətimin gündəmdə pulla qalmasını istəmirəm. Çox istərdim ki, klipi izləyənlər daha çox onun keyfiyyətindən və səviyyəsindən bəhs etsinlər. Maliyyənin nə qədər olmasına gəlincə isə onun klipin görüntüsündən bəllidir”.


Xatırladaq ki, klipdə təqdim olunan mahnının sözləri Leyliyə, musiqisi isə İlkin Həsəniyə məxsusdur.