Nəqliyyatın İntellektual İdarəetmə Mərkəzi və Park Bulvar birgə sosial aksiya keçirəcəklər

6-7-8 dekabr 2013-cü il tarixində Nəqliyyat Nazirliyinin Nəqliyyatı İntellektual idarəetmə Mərkəzi və Park Bulvar AVM-nin birgə təşkilatçılığı ilə Park Bulvar AVM-də “Yol hərəkəti qaydalarına riayət edək” şüarı ilə maarifləndirici aksiya keçiriləcəkdir.


Live.az bu haqda Park Bulvar-ın PR-meneceri Günay Malikqızı xəbər verib.


Azərbaycanda yol təhlükəsizliyinin təmin olunması sahəsində mövcud problemlərin aradan effektiv şəkildə qaldırılması vətəndaş cəmiyyətinin geniş iştirakını tələb edir. Tədbir sürücü və piyadaların, uşaqların yol hərəkəti qaydalarına dair bilik və bacarıqlarının artırılması, onlara təhlükəsiz davranış vərdişlərinin aşılanması və İntellektual İdarəetmə Sistemi haqqında ətraflı məlumat verilməsi məqsədilə təşkil ediləcək.


Həmçinin, yol hərəkəti qaydaları haqqında viktorinalar da təşkil olunacaqdır. Aksiyaya dəstək məqsədilə sənətçilər, teleaparıcılar, məşhur simalar da tədbirdə övladları ilə birgə iştirak edəcəklər. Tədbir 3 gün saat 17:00-dan 19:00-dək davam edəcək.


Qeyd edək ki, son illərdə yol nəqliyyat hadisələrinin, avtomobil idarə edərkən diqqətsizlik və qaydalara düzgün riayət olunmaması səbəbilə baş verən qəzalar və insan ölümlərinin sayının artmaqdadır. Bu kimi hadisələrin qarşısının alınması üçün belə maarifləndirici tədbirlərin davamlı olaraq keçirilməsinə ehtiyac vardır.