Azərbaycan "Türkvizyon-2013" musiqi yarışmasının finalına vəsiqə qazanıb

Dekabrın 19-da Türkiyənin Eskişehir şəhərindəki Anadolu Universitetində türk dünyasının ilk və yeganə musiqi yarışması olan "Türkvizyon-2013" beynəlxalq mahnı müsabiqəsinin yarımfinal mərhələsi keçirilib.

Trend-in məlumatına görə, yarışma Türk Musiqi Birliyi (TBM) televiziya kanalı, TÜRKSOY təşkilatı və "Eskişehir-2013" Türk Dünyasının Mədəniyyət Paytaxtı Agentliyinin birgə təşkilatçılığı ilə keçirilir.

Müsabiqədə Azərbaycan da daxil olmaqla 24 ölkənin təmsilçisi iştirak edir. Yarışmada Azərbaycanı "Yeni ulduz" mahnı müsabiqəsinin qalibi olan Fərid Həsənov təmsil edir. O, müsabiqəyə "Yaşa" adlı mahnı ilə qatılıb.

Münsiflər heyətinin səsverməsi nəticəsində yarimfinalda iştirak edən 24 ölkədən 12-si finala vəsiqə qazanıb. Finala yüksələn ölkələr arasında Azərbaycan da var.
Müsabiqənin finalı dekabrın 21-də keçiriləcək.