UEFA İcraiyyə Komitəsinin İspaniyanın Bilbao şəhərində keçirilən iclasında 2016-cı il Avropa çempionatının seçmə mərhələsinin təqvimi açıqlanıb.
Avro-2016-nın final mərhələsində iştirak etmək üçün 53 yığma komanda mübarizə aparacaq.
Seçmə mərhələnin 9 qrupunun hər birində 5 və ya 6 komanda yer alacaq. Qitə çempionatının ilk oyunları gələn il 7, 8 və 9 sentyabr tarixlərində baş tutacaq. Son oyunlar isə 2015-ci ilin 11, 12 və 13 oktyabr tarixlərində keçiriləcək.
Qrup lideri olan 9 komanda, ikinci olan daha 9 komanda və ən yaxşı üçüncü nəticə göstərmiş komanda birbaşa olaraq final mərhələsinə adlayacaq. Qrupda 3-cü yeri tutan 8 yığma isə öz aralarında "play-off" oyunları keçirəcək.
Turnirin final mərhələsi 2016-cı il iyunun 10-dan iyulun 10-dək Fransada keçiriləcək. Fransanın ev sahibi kimi birbaşa iştirak edəcəyi çemionatda ümumilikdə ilk dəfə 24 milli yığma mübarizə aparacaq.
Final mərhələsinin qruplarının püşkü isə 2015-ci il dekabrın 12-də Parisdə atılacaq. 24 ölkə hər birində 4 komanda olmaqla 6 qrupa bölünəcək.
Təqvimdən də göründüyü kimi, Avro-2016-da azarkeşləri bir çox yeniliklər gözləyir. Belə ki, ilk dəfə olaraq qrupda 3-cü yeri tutan komandalar "play-off" matçlarına çıxacaqlar. Ən yaxşı 3-cü nəticə göstərmiş komanda isə birbaşa final mərhələsinə vəsiqə qazanacaq.
Daha bir yenilik isə qitə çempionatının final mərhələsində 24 millinin yarışacağıdır.
Bundan başqa, Avropa çempionatının qrup oyunları eyni gündə keçirilməyəcək.
Seçmə mərhələnin təqvimi
1-ci tur: 7, 8, 9 sentyabr 2014
2-ci tur: 9, 10, 11 oktyabr 2014
3-cü tur: 12, 13, 14 oktyabr 2014
4-cü tur: 14, 15, 16 noyabr 2014
5-ci tur: 27, 28, 29 mart 2015
6-cı tur: 12, 13, 14 iyun 2015
7-ci tur: 3, 4, 5 sentyabr 2015
8-ci tur: 6, 7, 8 sentyabr 2015
9-cu tur: 8, 9, 10 oktyabr 2015
10-cu tur: 11, 12, 13 oktyabr 2015
Pley-off mərhələsinin təqvimi
İlk oyunlar: 12, 13, 14 noyabr 2015
Cavab oyunları: 15, 16, 17 noyabr 2015
UEFA-nın qərarı ilə həftəsonu keçiriləcək qarşılaşmaların saat 21:00 və 23:45-də, adi günlərdə isə 23:45-də başlamalıdır. Komandalar cüt oyunlarını cümə axşamı-bazar, cümə-bazar ertəsi və ya şənbə-çərşənbə axşamı sistemi ilə keçirəcək. Millilər yalnız çərşənbə günləri oynamayacaq.
