Yaqub Eyyubov: “Azərbaycan beş ildir MDB dövlətləri arasında iqtisadi cəhətdən liderdir”

“Azərbaycan MDB dövlətləri arasında iqtisadi cəhətdən liderdir və beş ildir öz iqtisadi liderliyini qoruyub saxlayır”.

APA-nın məlumatına görə, bunu Azərbaycan baş nazirinin birinci müavini Yaqub Eyyubov bu gün Bakıda keçirilən “Azərbaycan 2013-2018: yeni hədəflərə doğru” adlı konfransda bildirib.

O qeyd edib ki, beynəlxalq reytinq agentlikləri hətta beynəlxalq iqtisadi böhran zamanı Azərbaycanın suveren reytinqini yüksəldərək, investisiya səviyyəsində dəyərləndirib: “Bu, prezident İlham Əliyevin düşünülmüş və uzaqgörən siyasətinin nəticəsidir”.

Baş nazirin müavini əlavə edib ki, Heydər Əliyevin müəllifi olduğu Azərbaycanın neft strategiyası bu gün nəinki regionun, hətta Avropanın enerji təhlükəsizliyinin təmin olunmasında mühüm rol oynayır: "Şahdəniz-2" layihəsi üzrə yekun investisiya qərarının imzalanması Azərbaycanı dünyanın böyük qaz təchizatçılarından birinə çevirəcək”.

Y.Eyyubov əlavə edib ki, Azərbaycanın telekommunikasiya peykinin orbitə çıxarılması nəinki bu sahənin, bütün sahələrin inkişafına öz töhfəsini verəcək.