Bakı tamam dəyişiləcək

ANS TV-nin məlumatına görə, lakin yaxın illər ərzində Bakının hansı görünüşdə olması hər birimiz üçün maraqlıdır.

Live.az ans-ə istinadən bildirir ki, baş plan Bakını başdan-ayağa dəyişəcək. Uzun müddətdir ki, haqqında danışılan “Böyük Bakının Regional İnkişaf Planı” təsdiqlənəndən sonra, paytaxtda 2030-cu ilədək bir sıra dəyişikliklər gözlənilir. İlk növbədə, qeyri-bərabər sıxlığın aradan qaldırılması üçün əlavə mərkəzlərin yaradılması planlaşdırılır. 282 min hektarlıq ərazini əhatə edəcək paytaxtın 5 inzibati ölçü vahidinə, yəni rayonlara bölünməsi təklif olunur. Bura mərkəzi Bakı, ətraf, şimal-şərq və cənub sahili rayonları daxildir.

Bakı Dövlət Layihə İnstitutunun direktoru İlqar İsbatovun sözlərinə görə, nəzərdə tutulub ki, mərkəzin yükü azaldılacaq: “Ticarət və sənaye obyektləri, əyləncə mərkəzləri, iaşə obyektləri, ətraf ərazilərdə olsun. Ona görə də mərkəzdən bəzi binalar ətrafa köçürüləcək”.

Paytaxtda əhalinin sayı 2011-ci ilin statistikasına əsasən, 2,6 milyon nəfərdir ki, 2030-cu ildə bu rəqəm 3,850 000 olacaq. Bunun müqabilində 15 ildən sonra mənzillərə də tələbat artacaq ki, indikinə nisbətən 300 mindən artıq yeni mənzilin tikintisi planlaşdırılır. Statistikanın dəyişilməsi özünü məktəbəqədər təhsil müəssisələri, orta məktəblər, xəstəxanaların sayının artmasında da özünü göstərəcək.

Yeni Baş plana əsasən, “Xutor”, “Kubinka”, şəhərin mərkəzindəki “Beşmərtəbə” adlanan zona və “20-ci Sahə”də pərakəndə tikililərin olduğu ərazilər böyük söküntüyə məruz qalacaq. Söküntü işləri hələlik “Sovetski” adlanan ərazidə aparılır. Bura şəhərin yaşıl ağciyərləri sayılacaq, əsl təbii park salınması nəzərdə tutulur. Park özündə kəsişən avtomobil yollarından uzaq yaşıl zona yaratmağı nəzərdə tutur. Bu da şəhərin yeraltı və yerüstü hissələri arasında əlaqəni təmin edən yeraltı yol şəbəkəsi sayəsində mümkün olacaq.

“Sovetski”də heç bir hündürmərtəbəli bina inşa edilməyəcək. Layihənin strategiyasında ərazidə mövcüd olan tarixi tikililər qorunub saxlanılacaq. Həmçinin, Təzəpir məscidini, hətta uzaqdan belə, görmək mümkün olacaq.

“Böyük Bakının Regional İnkişaf Planı”na əsasən, “Qara şəhər” adlanan yerdə fəaliyyət göstərməyən sənaye müəssisələrinin ləğv edilməsi və boşaldılmış ərazinin məskunlaşma üçün mənimsənilməsi də nəzərdə tutulur. Bununla yanaşı, “Bakı Ağ şəhər” bulvarının salınması istiqamətində də işlər aparılır. “Bakı Ağ şəhər” ölçülərinə görə Monakodan böyük və “İçərişəhər”in ərazisindən 11 dəfə artıq olan 221 hektar ərazini əhatə edəcək və bu məkanı Qafqaz regionunun ən iri layihəsinə çevirəcək.

İlin sonuna qədər o, istiqamətdə əlavə 2 kilometr bulvar, avtomobil yolu, ictimai yerlər, parklar salınacaq. Bulvarın uzunluğu “Ağ şəhər”dən Bibiheybətə qədər uzanacaq.

Şəhərin yükünün azaldılması məqsədilə ali təhsil müəssisələrinin mərkəzdən kənara köçürülməsi, magistral yol xətlərinin salınması və yolların genişləndirilməsilə bağlı tədbirlər həyata keçiriləcək.