Azərbaycanın müdafiə naziri Zakir Həsənov Moskvada rusiyalı və iranlı həmkarları ilə keçirdiyi ikitərəfli görüşləri şərh edib

"III Moskva Beynəlxalq Təhlükəsizlik Konfransı çərçivəsində Rusiya və İran tərəfləri ilə baş tutan görüşlər yüksək səviyyədə və qarşılıqlı anlaşma şəraitində keçib".

Bunu APA-ya müsahibəsində Azərbaycanın müdafiə naziri general-polkovnik Zakir Həsənov bildirib.

Rusiyalı həmkarı Sergey Şoyqu və iranlı həmkarı Hüseyn Denhqanla keçirdiyi ikitərəfli görüşləri şərh edən Zakir Həsənov bildirib ki, hər iki ölkənin nazirləri ilə görüşlərdə hərbi sahədə əməkdaşlıq məsələləri müzakirə olunub: "Hər iki görüşdə müzakirə olunan əsas məsələ hərbi əməkdaşlıq məsələsi idi. Hərbi əməkdaşlığın bütün sahələri üzrə fikirlərimiz üst-üstə düşür. İki ölkə ilə də əməkdaşlığımız yüksək sürətlə inkişaf edir. Qeyd etməliyəm ki, həm hərbi, hərbi texniki və hərbi təhsil sahələrində əməkdaşlığa dair apardığımız fikir mübadiləsinin nəticələrindən tam razıyam”.

Azərbaycanın müdafiə naziri rusiyalı həmkarı Sergey Şoyqu ilə görüşdə Rusiya və Azərbaycan Dəniz Qüvvələrinin Xəzər dənizində birgə təlimlərinin keçirilməsi ilə bağlı müzakirə apardıqlarını da bildirib.