DGK: Azərbaycan-Rusiya sərhədində yaranmış avtomobillərin uzun növbəsi aradan qaldırılır

Dövlət Gömrük Komitəsi Azərbaycan-Rusiya sərhədində yük avtomobillərinin uzun növbəsinin yaranması məsələsinə aydınlıq gətirib.

Komitənin mətbuat xidmətindən APA-ya bildirilib ki, gömrük postları sərhəddə yaranmış növbənin aradan qaldırılması üçün gücləndirilmiş rejimində çalışır: “Bu məqsədlə bir avtomobilin sənədləşdirilməsinə ayrılan vaxt 20 dəqiqədən 8 dəqiqəyədək azaldılıb. İndiyədək 200-dən artıq avtomobil sərhəddən buraxılıb”.

Qeyd edək ki, Azərbaycan-Rusiya sərhədində yük avtomobillərinin uzun növbəsinin yaranmasına səbəb Rusiya-Gürcüstan sərhədində baş vermiş torpaq sürüşməsidir. Bu səbəbdən Türkiyəyə yük daşıyan avtomobillər Azərbaycan ərazisindən istifadə etməyə məcbur olublar.