Monserrat Kabalyenin İrəvan konsertinin təşkilatçısı: “Dağlıq Qarabağda konsert olmayacaq”

İspaniyanın məşhur opera ifaçısı Monserrat Kabalye Azərbaycanın işğal olunmuş Dağlıq Qarabağ bölgəsində çıxış etməyəcək.



APA-nın xəbərinə görə, bu barədə M.Kabalyenin İrəvan konsertinin təşkilatçısı Vaaqn Gevorkyan bildirib.



V.Gevorkyan dünya şöhrətli opera müğənnisinin iyunun 4-də Xankəndidə çıxış edəcəyi barədə məlumatları təkzib edib: “Bir təşkilatçı kimi deyirəm ki, Kabalyenin Dağlıq Qarabağda konsert verəcəyi barədə xəbərlər həqiqətə uyğun deyil”.



Qeyd edək ki, M.Kabalye Ermənistan iyunun 9-da İrəvanda konsert proqramı ilə çıxış edəcək. Artıq konsertin biletləri satışa çıxarılıb.