Fərhad Abdullayevin növbəti dəfə Konstitusiya Məhkəməsinin sədri təyin olunması ilə bağlı Azərbaycan prezidenti MM-ə təqdimat göndərib

Azərbaycan prezidenti İlham Əliyev Fərhad Abdullayevin növbəti dəfə Konstitusiya Məhkəməsinin sədri vəzifəsinə təyin olunması ilə bağlı Milli Məclisə (MM) təqdimat göndərib.

MM-dən APA-ya verilən məlumata görə, bu təqdimat əsasında F. Abdullayevin Azərbaycan Respublikası Konstitusiya Məhkəməsinin sədri təyin edilməsi barədə layihə növbəti plenar iclasda müzakirə olunacaq.
 
“Konstitusiya Məhkəməsi haqqında” qanuna edilən son düzəlişlərdən sonra Konstitusiya Məhkəməsinə sədr bu dəfə 15 illik təyin olunacaq. Düzəlişlərə qədər isə sədrin 10 ildən bir seçilməsi nəzərdə tutulurdu.
 
F. Abdullayev qanunun bundan əvvəl qüvvədə olan variantına əsasən, 25 iyun 2003-cü ildə seçildiyi üçün səlahiyyət müddəti bu il iyunun 25-də bitir. Bununla bağlı Azərbaycan prezidenti onun təkrarən Konstitusiya Məhkəməsinin sədri təyin olunması ilə bağlı namizədliyi barədə layihəni parlamentə təqdim edib.