Gəncədə yol qəzası baş verib

Gəncədə yol qəzası baş verib. Trend-in məlumatına görə, hadisə zamanı xoşbəxtlikdən xəsarət alan olmayıb.

Məlumatda bildirilir ki, qəza 22 nömrəli tam orta məktəbin qarşısında - Şota Rustavelli küçəsi ilə Cəfər Cabbarlı küçəsinin kəsişməsində baş verib. Vüqar Şərifovun idarə etdiyi "Hyundai" markalı avtomobil anidən qarşısına çıxan Fərşahın Ənvəriyə məxsus VAZ 2107 markalı maşınla toqquşub. Hadisə nəticəsində VAZ 2107-yə ciddi ziyan dəysə də, xoşbəxtlikdən xəsarət alan olmayıb.

Qəzaya ilkin səbəb olaraq VAZ markalı avtomobilin yola çıxarkən ehtiyatsız hərəkət etməsi, "Hyundai" markalı nəqliyyat vasitəsinin hərəkət istiqamətinin qəza yaratması göstərilir. Sakinlərin bildirdiyinə görə, Şota Rustavelli küçəsi ilə Cəfər Cabbarlı küçəsinin kəsişməsində, 22 nömrəli orta məktəbin qarşısında belə qəza hadisələri mütəmadi olaraq baş verir.

Qeyd edək ki, faktla əlaqədar Gəncə şəhər Polis İdarəsində araşdırmalar aparılır.